PINAHINTULUTAN na si Kris Aquino ng kanyang mga doktor na lumabas ng Makati Medical Center, matapos siyang ma-confine ng ilang araw dahil sa pagkadulas sa kanilang banyo habang naliligo.
Sa panayam kay Kris, sinabi niyang normal naman ang resulta ng mga laboratory tests na isinagawa sa kanya, subalit naapektuhan umano ang kanyang inner ear nu’ng mauntog ang kanyang ulo sa bathtub habang siya ay naliligo.
Pag-amin pa ni Kris, malaki raw ang tinamo niyang bukol sa ulo at tumaas din ang kanyang dugo kung kaya’t kinailangan siyang isugod sa ospital. Pero, agad naman daw siyang isinalang sa CT scan para makita kung nagkaroon ng blood clot sa ulo niya, at base nga sa resulta ng CT scan, may concussion o tama ang isang bahagi ng kanyang ulo dahil sa pagkakauntog nito sa bathtub.
Pero, pinayuhan din si Kris ng kanyang mga doktor na bumalik sa ospital sa Miyerkules para sa follow-up check-up. Payo pa rin ng mga doktor kay Kris, kailangan niyang mag-ingat at iwasan na maumpog muli ang kanyang ulo dahil minsan na itong nadisgrasya.
Pinayuhan din si Kris ng co-host niya sa The Buzz na si Boy Abunda na doblehin ang pag-iingat. Na magsilbing leksiyon ito kay Kris, na ingatan nang husto ang kanyang kalusugan, lalo na at sangkatutak ang trabaho nito.
Inamin ni Kris na dahil sa sobrang pagtatrabaho niya, minsan daw ay hindi na niya nabibigyan ng panahon o pansin ang kanyang sarili. Kulang na kulang din daw siya sa pahinga.
“Medyo kailangang mag-ingat kasi meron akong tendency na medyo elevated ang cholesterol, tapos elevated ang blood sugar. Kahit anu-ano na lang ang kinakain ko sa taping,” sabi ni Kris habang naka-confine sa Makati Medical Center.
