Michelle, 1 taon na ang kaligayahan kay Jon Hall!

“Wait na lang natin hanggang matapos ang First Time,” ang nakangi­ting sagot sa amin ni Michelle Madrigal nang maabutan namin siya sa set ng First Time at tanungin kung totoong may offer rin sa kanyang mag-TV5 kung kaya’t hindi siya kasama sa mga artista ng Royale Era na nabigyan ng guaranteed contract ng GMA 7.


“Actually, nagkaroon lang ng problem. So, inaayos pa. Mas mabuti siguro kung si Tita Anabelle (Rama) ang tanungin n’yo tungkol d’yan kasi, mas siya ang nakakaalam. Pero ang alam ko, magkakaroon, basta, may First Time pa kasi ako. So, hintayin na lang natin kapag tapos na ang First Time.”


Saan siya magkakaroon ng guaranteed contract, GMA pa rin or sa TV5?“Ha! Ha! Ha! Basta, wait na lang natin. Inaayos pa kasi. Pero okey naman ako sa GMA. Kahit paano naman, maganda naman ‘yung mga nagagawa ko. Pero siyempre, kahit sino naman, ‘di ba, basta kung saan ‘yung makakapagbigay sa ‘yo ng magandang opportunity at saka, ikayayaman mo, why not? Go! Ha! Ha! Ha!”


Anyway, parang hindi nga makapaniwala si Michelle na tahimik ang buhay niya ngayon. Aminado siyang may lovelife na kung tawagin niya ay half showbiz at half hindi. Pero, magaan daw ang samahan nila ngayon.


“Mas okey siguro na ganito na hindi masyadong out, eh, parang ngayon lang nga ako nagkaroon ng lovelife na tahimik lang, walang masyadong intriga. Ha! Ha! Ha!


“At saka, mas okey rin ‘yung hindi masyadong marami ang nakakaalam. Ang na­giging tendency kasi kapag alam ng marami, makita lang kayo or ‘yung isa sa inyo may kasama or may kausap, naku, isyu na. Ikaw naman, magagalit na. So, nagugulo. At least ako ‘eto, what you see is what you get. Happy naman ako.”


At imagine, one year na pala sila ng boyfriend niyang si Jon Hall, huh!