Nagulat ang TV host at talent manager na si Boy Abunda sa kumalat na balitang siya na ang bagong manager ni Angel Locsin. Umalis na raw sa poder ni Becky Aguila ang aktres at lumipat na sa kanya.
"Alam mo, nabibigla ako doon. Hindi ko alam. Nagulat na lang ako nung may nagsabi sa akin," sabi ni Boy nang makausap siya ng PEP (Philippine Entertainment Portal).
But just in case, willing ba siyang i-manage si Angel?
"Alam mo kapag may artisang lumilipat ng manager, nag-uusap kaming mga managers. Like, 'O, ano, lilipat si talent mo na ganito, nakikipag-usap sa akin. Okey ba 'yo? Ano ba ang estado niya? Ano ba ang problema ninyo, blah-blah-blah.' Kung acceptable sa akin ang dahilan, magpapasantabi ako, kakausapin ko na yung manager, 'Okey lang ba?' At sasagot, 'Boy, okey lang.' Kasi ang pananaw namin, parang kesa naman mapunta sa hindi natin kakilala, kaibigan, kamiyembro.
"With Becky, even if she's not a member of PAMI [Professional Artists Managers Inc.], she's my friend. She's a friend. Kung halimbawa may nagpadala sa akin na feeler from Angel at interesado ako, kakausapin ko muna si Becky. I'll call Becky.
"As a matter of fact today, I was planning [to call her], pero sabi ko napaka-defensive ko naman. I wanted to call Becky, I wanted to call Angel. Pero hindi ko muna ginawa kasi nahihiya... Hindi naman hiya, nailang ako."
Dagdag ni Boy, "But kung talagang susundin ko ang proseso, tatawagan ko si Becky. 'Becky, nag-uusap kami ni Angel. Gusto kong malaman kung ano ang estado ninyo.' Di ba? Mag-uusap kami. Magkukuwentuhan kami ni Angel. At bago ako magdesisyon, pag-iisipan ko at ia-announce ko. Pero wala talaga.
"Kung may lumapit, you know... Ganito lang, she's very special to me—si Angel. Mahirap sagutin yung interasado ako kasi hindi ko alam. Ang una kong problema ngayon kapag may nagpapa-manage sa akin, lalo na yung may pangalan, wala akong oras. I'm very, very, very busy. Pero depende sa requirements.
"May mga malalaking artista na lalapit sa akin, 'Boy, hindi mo naman ako kailangang i-manage. Gusto ko lang may tagabasa ng kontrata. Ako na ang bahala sa sarili ko.' Yung ganyang arrangement, okey ako. Merong ganyan na lumalapit sa akin. Kapag may ganyan, okey ako. Pero kapag full management, 'yan ay pag-uusapan talaga," saad niya.
Paano kung ayaw na talaga ng talent sa huli niyang manager?
"Bablangkahin ko. 'Alam mo, ang problema ninyo ganito, etc.'' Pero bihira naman ang manager na magsasabi na, 'Boy, huwag mong tanggapin.' Lahat ng manager nagsasabi, 'A manager should always be ready that one day a talent will go.' But you are never ready. You're never ready.
"Ang sinasabi ko lamang, that's the nature of the job. Yun ang isa sa mga dahilan kung bakit ayokong may kontrata. Kasi the option to leave should not only belong to the artist. The option should also belong to the manager. Kasi kung may mga pagkakataon na hindi na kami nagkakasundo ng talent ko, dapat meron akong karapatang magsabing 'Hindi na tayo nagkakasundo' in many ways, di ba?
"Yun lang, na-shock lang ako doon sa Angel. Parang walang pinanggalingan. But I really adore the girl. She's really, really special," saad ni Boy.
Samantala, itinanggi na rin ni Angel ang balitang si Boy na ang manager niya sa pamamagitan ng kanyang Twitter account.
RIMA OSTWANI. Pero binanggit naman ni Boy na meron siyang bagong talent ngayon sa kanyang management company na Backroom, Inc. Ito ay walang iba kundi si Rima Ostwani, ang nobya ng aktor na si Diether Ocampo.
"Hindi mag-aartista si Rima," paglilinaw ni Boy. "I'll be representing her lang sa kanyang endorsement contract. Pakikiramdaman namin, in terms of lifestyle. Kasi, di ba, she works for Rustan's? Baka halimbawa yung mga show na mala-US Girls. Kanina lang kami nag-close."
Kaninong idea that she'll be entering showbiz as a host?
"She was the one," sagot niya. "Hindi pa host, endorsement muna. Pero pinag-aaralan pa kung puwede siya sa live feeds. Do you know that she's very interesting? She's the president of the Student Council when she was in St. Paul's. She took up International Relations in La Salle. She was part of the Student Council in La Salle. Now, she handles retail for Rustan's, VIP clients.
"Nung nag-usap kami, I was totally, totally impressed. She speaks five languages—Tagalog, English, Spanish, French, and Arabic. Ang galing! Katulad kanina, tinanong ko siya, 'Is Diet comfortable with me?' 'Yeah,' sabi niya. Importante sa akin yung relasyon."
BABY JAMES. Ang isa pang alaga ni Boy ay ang anak nina Kris Aquino at James Yap na si Baby James. Tatlo daw silang managers ni Baby James.
"I am in-charge of all the endorsements," sabi ni Boy. "Televison, I don't know... Si Deo [Endrinal], oo, manager din ni Bimbi [tawag ni Boy kay Baby James]. I am in charge of endorsements because I handle naman endorsements of Kris. Kasi pag Kris and Baby James, ako yun. Yung kay Baby James at James, kay Dondon [Monteverde] dapat yun. Nagkataon lamang na yung Sunlife is my deal. Pero merong darating na bagong commercial sina Kris and Baby James."
Lahat daw ng ini-endorse ngayon ni Kris ay si Boy ang nakipag-negotiate.
"Oo naman. Lahat ng endorsements of Kris, lahat sa akin. This year, mga renewals kaming lahat, e. Sa mga renewal, huwag nating tawaging komisyon. She's the most generous person in the world. Minsan dadatingin ka na lang ano, 'Ano 'yan? Huwag na.' Siya pa yung nag-i-insist. Money is never a problem to her. At hindi namin talaga, hindi yung, 'Meron pa ba akong collectibles?' Hindi ganun. Wala akming ganun ni Kris."
Naaaliw naman ang marami tuwing ipinapalabas ngayon ang bagong TV ad campaign ng presidentiable na si Senator Noynoy Aquino dahil sa paglabas sa bandang huli ni Baby James.
Hindi hamak na mas bata si Baby James na pumasok sa showbiz and politics kesa sa kanyang ina na si Kris, na nangampanya din noon sa yumao niyang ama na si Senator Ninoy Aquino. Habang proud na proud naman ang ninong ni Baby James na si Boy sa paglabas ng kanyang inaanak sa TV ad campaign ni Noynoy.
Dahil pumasok na sa showbiz at pulitika si Baby James, iniiintriga agad ang anak nina Kris at James sa child star na si Zaijan Jaranilla, na mas kilala bilang si Santino. Si Baby James na raw kasi ang bagong child superstar.
"Ay, huwag naman. Not on that context," depensa ni Boy. "Bata pa sila para mag-away. Pero siyempre kung ako ang tatanungin, child superstar sa akin si Bimbi. Pero pareho silang child superstars. O, di ba?"
0 comments:
Post a Comment