Itinanggi ni Judy Ann Santos na sa kanya unang in-offer ang papel para gumanap bilang si dating Pangulong Cory Aquino sa isang episode ng Maalaala Mo Kaya, kung saan ilalarawan ang buhay ng namayapang dating Pangulo at ng asawa nitong si Senator Benigno "Ninoy" Aquino Sr.
"Ha? Hindi, hindi ko alam yun. Ang alam ko, yung movie, pero hindi MMK. Wala, walang in-offer sa akin. May pahaging, pero walang formal usapan about the project," paglilinaw ni Judy Ann nang makausap siya ng PEP (Philippine Entertainment Portal).
Ang gaganap na Cory sa naturang episode ng Maalaala Mo Kaya ay si Bea Alonzo, samantalang si Piolo Pascual naman ang gaganap bilang Ninoy.
Tinanggap na ba ni Juday ang sinasabi niyang film project na inu-offer sa kanya, kung saan si Piolo rin ang napapabalitang gaganap bilang Ninoy?
"Siguro it would much be better if we talk about it na walang kamerang nakaharap, yung talagang... Ayoko kasing sabihin ng ibang tao na ngayon pa lang nagpo-promote na kami ng pelikula dahil it's a project with Piolo.
"And everything can happen as of now, kaya I cannot say na this year, I will be doing a project with Piolo, or this year I may not be doing a project with Piolo. Anything can happen. Hindi imposible. Hindi pa rin naman sure kung posible... Alam mo yun, pag-iisipan pa, basta maganda yung proyekto," saad niya.
OPEN TO WORK WITH PIOLO AGAIN. Hindi rin totoong tinanggihan ni Juday ang proyekto dahil ayaw niyang makasama sa trabaho si Piolo.Wala raw rason para umayaw siyang makatrabaho si Piolo. Matagal na raw naman silang in good terms ulit matapos magkaroon ng hindi pagkakaunawaan sa pagitan nila noon, pati ng mister ng aktres na si Ryan Agoncillo.
"Oo naman, matagal na!" bulalas ng aktres. "Matagal na kaming okay mula nung napabalita na nag-usap na sila ni Ryan, and nag-usap na rin naman kaming tatlo. Ang tagal-tagal na ng balita 'yan. Hindi lang nakikita ng mga tao na we're friends.
"May mga times na nagkakasalubong kami, let's say sa kung saang restaurant. Madalas kaming nagkakasalubong, or minsan nagge-guest ako sa ASAP. Nag-uusap kami, wala nang isyu. Noon pa yun at iba na ang buhay ko ngayon, iba na rin ang buhay niya ngayon."
So, okay na sa kanyang makatrabaho si Piolo?
"Yung sa pagtatrabaho, ang kumplikasyon lang naman diyan, yung mga taong nag-iisip na may iba pang nagaganap sa amin ni Piolo maliban sa pagiging magkaibigan. So, hangga't hindi sila nagma-mature, hindi muna ako gagawa ng pelikula [kasama si Piolo]. Ako mature, sila hindi... Hoy, hindi si Piolo, ha! Yung mga kung sino na nag-iisip ng kung anu-ano," paglilinaw niya.
NOT TAKING DRUGS TO BECOME PREGNANT. Nilinaw rin ni Judy Ann ang tungkol sa balitang may mga gamot siya diumanong iniinom para mabuntis siya agad. Mag-iisang taon na silang kasal ni Ryan at hindi pa rin nagdadalang-tao ang aktres.
"Ano po siya, I've been taking medications since after the wedding. Ano lang, for preparation lang, like folic acid, ganyan. Para lang sa pagpapatibay ng immune system. Pero other than that, wala namang ano.
"Gusto ko lang fully prepared yung sistema ko bilang dalawang dekada akong nagtatrabaho, baka hindi siya... At, first time kong magbubuntis kung saka-sakali, so kailangang maghanda," saad niya.
Speaking of trabaho, sa February 1 ay muling mapapanood si Judy Ann sa isang teleserye. Ito ay sa pamamagitan ng Nurserye na Habang May Buhay sa ABS-CBN. Makakasama niya rito sina Derek Ramsay, Will Devaughn, Joem Bascon, Gina Alajar, Rio Locsin, Tetchie Agbayani, John Arcilla, at Sid Lucero.
0 comments:
Post a Comment